Oñatira heltzea eta bildots erre usaina hartzea, biak bat, izan dira. Izan ere, gure artzainek ekoizten dituzten produktuak ezagutzera emateko helburuarekin, gaztak dastatzeko eman eta saldu ez ezik, Debagoieneko bildotsak burruntzian erre eta pintxotan eman dituzte. Usain ezin hobea zerien eta makina bat jende ikusi dugu pintxoa jaten, eta txakolina edaten; Getariako Txakolinaren jatorri izendapena duten Arrasateko Otxia eta Oñatiko Upain txakolinak.
Bailarako gaztak aukeran
Gazta izan da eguneko beste protagonista eta, kasu honetan ere, bailarako artzainek Idiazabal jatorriko ardi latxaren esne gordinez nahiz ardi latxaren esne ekologikoarekin egindako gaztak izan dira aukeran, zaharrak eta berriak; eta kasu batzuetan, baita ahuntz eta behi gaztak ere.
Erosi aurretik probatzeko aukera izan dute salmenta puntuetara gerturatutako herritar eta bisitariek eta, hartara, erosi aurretik gehien gustatzen zaiena zein den jakiteko modua izan dute. Saltzaileak pozik agertu dira, salmentak nola zihoazen ikusirik, nahiz eta jendeak gazta osoa baino gehiago erdia edo laurdena erosten zuela kontatu diguten. Erosleek zaporea hartzen dute aintzat gehienbat, bat edo beste aukeratu erabakitzerako orduan, baina asko eta askok bertako produktua izatea baloratzen dute gehien.
Artzain batzuek, gainera, gatzatua egin dute lehen orduan, eta harrera ona izan du horrek ere.
Kroxeters taldekoen lana
Bien bitartean, Foruen plaza erdian, mahai baten bueltan, lanean jardun dute Kroxeters taldeko hainbat lagunek. Gantxilloa, artilea eta orratzak hartuta, hainbat pieza osatu dituzte, eta plaza alboko zuhaitzak apaindu dituzte gero horiekin.