Oñatirako propio antolatutako Inauteriko Dantzak 2013 ikuskizuna izango da, duda barik, aurtengo Aratusteetako hitzordu garrantzitsuenetakoa. Zapatuan, egun osoz ibiliko dira kalez kale dantzan. Antzerkia, pailazoak, txokolatada, txorimaloak edo erromeria ere Aratusteetako egitarauan daude..
Oñatiko musikariak, Inauteriko lantaldea eta Oñatz dantza taldearen eskutik, kalez kale ibiliko dira zapatuan dantzan 100 herritar baino gehiago. 11:30ean Olakua auzotik aterako dira, eta 17:30ean, berriz, kiroldegitik. 210 lagun elkartuko dira bazkaltzeko. Domekan, bestalde, musika bandak kontzertua eskainiko du 11:00tan Santa Anan eta arratsaldean, 18:30ean, Luzaideko Inauteriak dantzatuko dituzte Oñatzeko dantzariek.
Gaur ere mozorrotuta
Bestalde, gaur, egubakoitza, pailazoz mozorrotuko dira Txantxiku Ikastolako Haur Hezkuntzako ikasle eta irakasleak eta Lehen Hezkuntzakoak, sorginez. 14:30etik 16:30era egingo dute mozorro festa Zubikoa kiroldegiko kantxan (ona egiten badu kalera aterako dira).
Herri eskolakoak, berriz, Altsasuko inauteriez mozorrotuko dira; kiroldegiko pilotalekuan dute hitzordua arratsaldean.
Elkar Heziko ikasleak berriz, martitzen goizean jantziko dituzte mozorroak. Euskal Herriko mitologiatik hartutako herensugearen irudia aukeratu dute aurten.
