Domekan beteko dira 30 urte Angel Fernandez hil zela. Iraultza erakunde armatuko kide zela, Gasteizen, enpresa batean lehergailua jartzeko asmoa zutela, esku artean zerabilela lehertuta, hark eragindako zaurien ondorioz hil zen. Besteak beste, nuklearren kontrako mugimenduan, EMK alderdian, Zer Xabilau? udal kandidaturaren bultzatzaile, gaztetxearen sorreran eta mugimendu feministan ibilitakoa, Fernandezen izaera nabarmentzen dute San Martingo etxe okupatuko kideekin batera hura gogoratzeko asteburu honetako ekintzak antolatu dituzten garaiko lagun taldekoek.
Marrazketarako zaletasuna ere ba omen zuen Fernandezek, eta ibili ohi zen mugimenduetarako egindako zenbait kartel eta bestelako lanak erakutsiko dituzte egitarauaren barruan antolatu duten erakusketan. Hiruzpalau egunez egongo da ikusgai Antixenako gaztetxean, 1980an Lemoizen kontra Debagoienean egindako bizikleta martxa bateko bideoarekin batera.