Oñatiko Elkar Hezi ikastetxeko batxilergoko lehenengo mailako ekonomiako ikasleek arreta bereziz jarraitu dute hitzaldia, klaseetan diruaren bilakaera aztertzen ari direlako eta ikasleek garbi ikusi dute oso garrantzitsua dela jakitea norberaren dirua non inbertitzen den.
Ekonomiako ikasleak ez direnak ere izan dira hitzaldia entzuten eta eurendako ere hitzaldia interesgarria izan da, ez zekiten hainbat gauzen inguruko informazioa jaso dutelako.
Justizia soziala
Martin Jauregialtzo Elkar Heziko kultura teknikariak azaldu digu, eurendako oso garrantzitsua dela ikasgaien bitartez ikasleei balore zehatz batzuk txertatzen joatea. Irakasleen helburua, beraz, izan da klase eta hitzaldiaren bitartez, ekonomiaren oinarria irakasteaz gain, justizia sozialaren balorea ere txertatzea. Eta jasotako informazioak ikasleei hausnarketarako bidea eman die.