Kirolariz bete zen egubakoitz iluntzean Oñatiko udaletxeko osoko bilkuren aretoa, amaitzera doan urtean gehien nabarmendu direnak saritu zituzten-eta.
Banakako sariak Marisol Ramos atletarentzat eta Jone Elortza sokatiralariarentzat izan ziren, epaimahaiak bakarra aukeratu ezin-eta. Izan ere, biak izan dira Munduko txapeldun 2012an: Ramos maratoi erdian, Finlandian –Gipuzkoako, Euskadiko eta Espainiako txapeldun ere bai, modalitate eta luzera desberdinetan–; Elortza goma gaineko txapelketan, 500 kilokoan, Gasteizko Badaiotz taldearekin, Eskozian –zilarra ere bai 540 kilokoan, eta Euskal Herriko txapelketa bi pisuetan–.
Entrenatzaile lanagatik emandako saria Alberto Lera karatekarentzat izan da aurten, hainbat urtetan egindako lan isilagatik.
Norbanakoez gain, baina, taldeak ere saritu zituzten: talde onenarena Aloñako atletismo sailarentzat –149 domina aurten–, egindako lanaren eta lortutako emaitza onen ondorioz, Espainiako kros txapelketan taldeka lehiatua aurrenekoz; eta Eskola Kiroleko koordinatzaile eta gurasoentzat ere saria, urteetako lanagatik.
Aipamen bereziak
Aipamen bereziak, azkenik, Udana Motor Taldearentzat eta AMET, Aloña Mendiko espeleologia taldearentzat izan ziren.