Lehenengo hiru minutuen ondoren, emaitza 9-0 zen Zubikoan, eta Cavadaren mateak argi utzi zuen Oñatikoen nagusitasuna margo gainean. Ondo baino hobeto hasi zen zapatuko norgehiagoka Blancoren mutilentzat, eta partidu osoan zehar gidoia berdintsua izan zen: Oñatikoek errebote defentsiboa kontrolatu eta gero azkar jokatzen saiatu. Urretxukoek zonakako defentsa erabili zuten lehen partzialeko saskiraketa jarioa mozteko. Hala ere, hiruko marratik fin ibili ziren eta buru hotzarekin erasotu zuten defentsa. Lehen laurdenean partidua bideratuta utzi zuten.
Hurrengo garaipenaren bila
Atsedenaldia heldu aurretik, Urretxukoek 3-15eko partziala lortu zuten, baina hirugarren laurdenean berriz ere errebotea kontrolatu eta partiduaz jabetu ziren oñatiarrak. Aipatzekoa, Gartziak eta Cavadak egindako partidua: bien artean 47 puntu lortu zituzten. Sei partidutik bost irabazi dituzte eta aste honetan seigarren garaipena lortzen saiatuko dira sailkapeneko lehen postuan jarraitzeko eta bolada onari eusteko.