Hiru gazte berri sartu dira batzordera orain, eta bederatzi lagun daude, baina sei bat lagunek jarraituko dute. Batzordeak prestatzen du urteko egutegia eta lantaldeen laguntza izaten du horretarako. Izan ere, ekintza konkretuen inguruan sortzen diren lantaldeen laguntza izaten du batzordeak urteko ekitaldiak burutzeko, eta hamabostaldiak bere lantaldea du.
Lantalde ezberdinak
Horrela, irteerak, adibidez, beste lantalde batek antolatzen ditu. "Urtean 10 irteera izaten dira, hileko bat, abuztuan eta irailean ezik. Horrez gain, bi zeharkaldi ere bai, maila baxukoa bata eta altukoa bestea. Orain, GPSarekin errazagoa da, baina askotan bidaia bat baino gehiago egin behar izaten dituzte lantalde horretako kideek irteeraren ibilbidea ezagutzeko", dio Iñaki Idigoras mendi saileko kideak. Argazki lehiaketarako, adibidez, Ilunpetan taldearen laguntza izan dute. "Elkarlan polita sortu da bion artean, eta asko eskertzen diegu hartu duten lana".
Eskalada indartu guran
Bestalde, egun hauetan ari dira mendian federatuta daudenen txartelak tramitatzen. "853 federatu daude. Mendi federatu gehien dituen Gipuzkoako hirugarren herria da Oñati, eta bazkide gehien dituen herriko taldea", azaldu du Juan Mª Ibarrondo mendi saileko kideak.
Eskalada indartzea da batzordekideen erronka berria. Eskalada eskola berreskuratu gura dute eta Araotzeko eskolaren mantenuaz arduratu ere bai, Udalaren laguntzarekin. Bestalde, Araotz ingurua denondako erosoa izateko lanean jarraitzen dute auzotarrekin.