Baketik 2006an jaio zen Arantzazun. Borondate desberdinek bat egin zuten: frantziskotarrak, Elkarri gizarte mugimendutik zetozen pertsonak eta beste laguntzaile batzuk. Arantzazu eta frantziskotarren erakundearekiko lotura izan dira Baketik-ek sei urte hauetako ibilbidean izan duen erreferentzia-esparrua. Irailaren 29an eta urte beteko gogoeta-prozesuaren ondoren, Baketik-ek egungo egoeran bere misioa birmoldatzen duen egitasmo berria aurkeztu du.
Arantzazu Baketik Fundazioaren Patronatuak hartu dituen erabakiak, zuzendaritza-taldearen eta lan-taldearen adostasunarekin, ondorengoak dira:
1. Fundazioaren estatutuak aldatzeko beharrezko izapideekin hasi, hemendik aurrera Baketik frantziskotarren erakundearengandik entitate autonomoa izan dadin.
2. Kostuak murrizteko eta giza baliabideak eta ekonomikoak optimizatzeko bulego berria zabaltzea hirigunetatik gertuago. Honek Arantzazun presentzia mantentzea; baina pixkanaka murriztea esan nahi du.
Frantziskotarrek zein Baketik-eko taldeak azpimarratu nahi dute sei urteko lankidetza-aldi hau emankorra eta positiboa izan dela. Beren esker ona adierazi nahi diote elkarri fase berri honetan egitasmoaren oinarria eraikitzeko egin duten ahaleginagatik.
