Iragarpenaren arabera, gaur 18:00etan hasi eta bihar gauedira arte, 24 ordutan 60 l/m2 baino gehiago pilatzeko arriskua dago, eta ordu betean 15 l/m2 baino gehiago pilatzekoa. Egoerak okerrera egin dezake, bereziki, bariku goizeko bederatzietatik aurrera: 24 orduko epean, 80 l/m2 botatzera ailegatu daiteke.
Aurreikuspen horiekin, euri-jasak gertatzen direnerako aholkuak eman ditu Eusko Jaurlaritzako Larrialdiei Aurre Egiteko eta Meteorologia Zuzendaritzak, ondorio txarrak saihesteko edo ahalik eta gehien murrizteko:
Prebentzioko neurriak:
- Ez ibilgailurik utzi ibaien ertzetan. Gerta liteke urak bat-batean gainezka egitea.
- Kendu ibilgailuak ur-putzuak sor daitezkeen inguruetatik eta urpetu daitezkeen garajeetatik.
- Ahal baduzu, ez hartu autoa.
- Bidaiatu beharra izanez gero, ahal dela, ibili errepide nagusi eta autobideetatik, eta behar bezala ikusteko arazoak izanez gero, gelditu leku segururen batean.
- Erretiratu urak eramateko moduko gauza guztiak, batez ere, kutsadura eragin dezaketen produktu arriskutsuak.
- Begiratu inguruko hustubideak ondo dauden.
Larrialdietan hartu beharreko neurriak:
- Urrundu erreka, uhar, zubi edo urpean gera daitezkeen lekuetatik, eta ez saiatu urak hartutako lekuetatik pasatzen, ez autoz ez oinez.
- Ura dela-eta autoa errepidean ez aurrera ez atzera geratzen den kasuetan, itzali argiak eta irten autotik.
- Mendi-magaletatik eta muino-magaletatik urrun egon, ura, harriak eta lohia amil daitezke-eta.
- Ura etxebizitzara sartuko balitz, alde soto eta behe-solairuetatik ahalik eta azkarren.
- Etxea utzi behar izanez gero, itzali argindarra eta itxi gasa eta ura, eta utzi ohar bat ostatua non hartuko duzun adierazteko.
- Jo leku altuenetara; saihestu urpean gera daitezkeen lekuak.
- Jakinaren gainean egon beti, irratiz edo bestela, jakiteko egoera zertan den eta eguraldiaren iragarpenak zer dioen.
Larrialdietan, deitu 112 zenbakira.
Oñatiko gertaeraren argazkiak:
Tamaina handiko adarra bota zuen haizeak.
Garabia zuhaitz adarra auto gainetik erretiratzeko lanetan.
Ikusmina eragin zuen gertaerak.
Udaltzainak, lanean.