Jerardo Elortza historialariaren arabera, Errosaixo Bixamona beti izan da jaietako egun handietako bat, baita San Migel Bixamona ere. San Migel eta Errosario egunak hitzordu serioak omen ziren; Bixamonak aldiz, parrandarako aukera gehiago ematen zutenak.
Herritarren sormena
Zezenak eta kalejirak izaten ziren, lehen, Bixamonetako ekitaldi garrantzitsuenak. Aurretik koadrilaren batek edo bestek horrela egiten zuen arren, mozorrotzeko ohiturak trantsizio ostean hartu omen zuen indarra, eta horrela mantendu da gaur egun arte.
"Jaietako hiru egun nagusien artean, kaos izaera handienekoa da, jendeak sormena ateratzen duen eguna", dio Manu Egañak, Kultura zinegotziak, eta gaineratu: "Herri batek ez duela egitarau potente baten beharrik erakusten du; herria antolatzen denean, besteak soberan gaudela". Horrek ez du esan gura egitarauan hutsik dagoen eguna denik: musika eta sokamuturra ere izango dira.
Kalejirak eta kontzertuak
Sokamuturrari dagokionez, bi saio izango dira: 09:30ekoa eta 17:00etakoa. Bi saioak Arno ganadutegiko zezenekin egingo dira.
Musikari dagokionez, eguerdian musika banda ibiliko da kalejiran eta 18:00etan, Skandalue Elektrotxaranga. 18:30ean herriko musikarien Di-Bertsioak izeneko emanaldiak izango dira txosnetan, eta 20:00etan eta 23:00etan, Lisker taldearekin dantza egiteko aukera egongo da plazan. Bazkaltzeko paella egongo da txosnetan; zazpi euro balio du sarrerak.