Txantxikuaren jaitsiera
San Migelei behar den moduko hasiera emateko, Txantxikuaren jaitsiera egingo dute irailaren 28an, arratsaldeko zortzietan. Txantxikua kanpandorretik txosnagunera jaitsiko da, eta orduan hasiko dira txosna batzordearen jaiak.
Horrez gain, egubakoitzean danborrada egongo da Oñatiko kaleetan zehar, eta beste konpartsa bat sortu dute batzordekoek. Bertan, 220 lagun berrik hartuko dute parte, egindako deialdiari erantzunda, eta Oñatiko triki-txarangarekin sortutako kantu berriak estreinatuko dituzte.
Eta goizeko zortzietan, gaupasa-zaleen argazkia egingo dute txosnagunean, txokolate-janarekin bat.
Kontzertua eta Olinpiadak
Zapaturako rock kontzertua antolatu dute. Besteak beste, punk-rock, heavy, stoner eta 60ko hamarkadako ska doinuak izango dira entzungai: KOP katalanek, Akatz bilbotarrek, Gaur Ez iruindarrek eta GAS oñatiarrek berotuko dute bigarren gaua.
Urriaren 5ean, berriz, Egun Morea ospatuko dute, eta genero berdintasuna aldarrikatzeko asmoz ekitaldi bereziak antolatu dituzte. Olinpiada Moreak dira egun horretako ekitaldi nagusia, eta jende asko elkartzea espero dute, gazteengan kontzientzia morea esnatzeko.
Manifestazioa eta paella
Herri Egunean, urriaren 6an, preso politiko eta iheslarien eskubideak aldarrikatzeko Herrirak antolatu duen ekitaldian izango dira txosna batzordeakoak.
Eta jaiei amaiera ezin hobea emateko, Errosaixo Bixamon egunean, urriaren 8an, paella-jana eskainiko dute txosnagunean. 500 lagunentzako mahai, aulki eta edariak jarriko dituzte, eta txartelak eskuragai daude dagoeneko.
Eta gauean, ohitura denez, Oñatiko taldeak taula gainera igoko dira, talde ezagunen bertsioak eskaintzera.