"Lau konpainiek hartuko dute parte eta bakoitzeko hiruzpalau ume joango dira danborra jotera San Martingo zaharren egoitzara. Kapitainak ere joango dira. Musika jarriko dugu han eta 20 bat umeko taldeak danborra joko du, hango egoiliarrendako. 17:00tan izango da hori. Gero Santa Marinara jaitsiko dira gero umeak, handik abiatuko baita, betiko moduan, aurtengo umeen danborrada, 18:00tan", argitu du antolatze lanetan ibili den Argilorain Perosterenak. Santa Marinatik irten eta betiko ibilbidea izango du danborradak, herriko plazan bukatzeko. Amaitu ostean, baina, merkatu aldera joango dira umeak, nagusien danborradan moduan, ez Alhondigara, orain arte bezala.
Oñatiko zaldiak
Aurten, gainera, Oñatikoak dira danborrada hasieran joango diren zaldiak, Jon Elortzarenak, hain zuzen. Zaldi gainetan joango direnak, berriz, bederatzi urteko Ioritz eta Naia dira.
Guztira 150 bat umek hartuko dute parte biharko umeen danborradan. 30. urteurrenaren harira, antolatzaileek dei berezi bat egin dute herriko umeak mozorrotuta joateko. "Urtetik urtera ume gutxiago joaten da mozorrotuta eta hori berreskuratu gura dugu", arrazoitu du Argilorain Perosterenak.