Zapatuan ekingo diote festari mountain bike lasterketarekin, futbol partiduarekin eta txorimaloekin. Gauean, berriz, diapositiba eta bideo emanaldia izango dute, 11:00etan. "Urtero egiten dugu diapositiba emanaldia. Duruko argazkiak izaten dira. Aurten, baina, Gomiztegiko 50 urteko historia azaltzen duen bideo bat ere emango dugu. Oso bideo polita da", adierazi digu antolatzaile lanetan ibili den Bittor Alberik.
200 lagun bazkarirako
Domekan, meza izango dute Aierdiko aterpean hildako auzotarren alde, eta ondoren, salda beroa eta pintxoak. 12:00etan Unaimendi gainean, herri kirolak egingo dituzte bertaratzen direnekin. Aierbek zehaztu digu: "Beste urte batzuetan ardi txakur erakustaldia egin izan dugu. Aurten, herri kirolak egingo ditugu auzoko jendearekin: soka-tiran, txingak, kaskara batzea eta aizkoran". Auzoko artzainen gazta dastatzea ere izango da.
Ostean, txabolaz txabola kalejira egingo dute trikitilari eta bertsolarien. Bazkaria ere izango dute, 200 lagun elkartuko dira. "Behin tripa bete ostean, bertsolariek bertso batzuk kantatuko dituzte eta gero erromeria. Aurten, gainera, zubia tokatzen da eta ez dugu erretiratzeko presarik izango. Hurrengo egunean, baina dena jaso behar da".
Egitaraua
Zapatua
- 17:00etan mountain bike lasterketa.
- 18:00etan futbol partiduak.
- 19:30ean txorimaloak.
- 23:00etan diapositiba eta bideo emanaldia
Domeka
- 11:00etan Aierdiko aterpean meza. Ondoren, salda eta pintxoak.
- 12:00etan herri kirolak Unaimendi gainean.
- 13:00etan kalejira.
- 15:00etan bazkaria. Ostean, erromeria.
Lizargarete eguna
Abuztuan ere izango da parrandarako beta. Hainbat auzotan ospatuko dituzte jaiak: Lezezarrin, San Lorentzon eta Urrexolan. Bestalde, abuztuaren 26an, Lizargarate eguna egingo dute. Bazkarirako izena ematea: Urbia eta Umerez tabernetan, eta Lizargaraten. Herri kirolak ere egingo dituzte. Parte-hartzeko izena eman behar da aurretiaz toki berdinetan. Trikiti doinurik ere ez da faltako. Bazkal ostean, Imanol eta Narbaizarekin erromeria.