Josean Cavada donostiarra Oñatin izan zen barikuan bere talde berriarekin kontratua sinatu eta datorren denboraldian Aloñan jokatuko duela adierazteko. 23 urte ditu eta 2,04 metro. Azken lau denboraldiak LEB ligan jokatu ditu, Lan Mobel taldean. Baina pasadan urtean belauneko lesio bat zela medio, denboraldi gehiena kantxatik kanpo pasatu zuen. Orain, berriz bueltan da, gogo eta ilusioz gainezka.
Beste hiru urtez Bartzelonako harrobian ere izandakoa da Cavada. Izatez, Espainiako selekzioarekin Europako txapelketa batean brontzezko domina lortu zuen Ricky Rubio eta beste zenbait jokalarirekin.
Entrenatzaile berria
Denboraldi berriari begira, entrenatzaile berri baten bila dabil Natra-Oñati azken egunetan. Entrenatzailea lotzeaz gain, jokalari berri gehiago ekartzeko asmotan ere badabiltza arduradunak. Asier de la Iglesiak taldean jarraitzeko asmoa erakutsi du, eta beste batzuk zalantzan daude. Dena dela, hurrengo egunetan plantilla osatu eta gauzak zehazten joango dira.