Zapatu arratsaldean kontzertuak izan ziren Oñatiko Gaztelekuan. Taula gainera igotzen lehena Aitor Regueiro bakarlaria izan zen. Giro lasaia sortu zuen oñatiarrak eta bere hitzen umiltasun bortitzarekin aho zabalik utzi zituen bat baino gehiago. Txalo asko jaso zituen.
Ostean, El Trio Calavera taldearen txanda izan zen eta hauen ardura izan zen giroa berotzea. Euren rumba estiloak bat baino gehiago jarri zuen dantzan. Ezin da ukatu taldeak nortasun berezia duela eta euren kontzertuetan ez da 'katxondeorik' falta izaten.
Gauari amaiera Buru-Hilketa taldeak eman zion. Gupida gabeko punkaren txanda etorri zen orduan, besteak beste, Cicatriz, RIP eta Eskorbuto taldeen bertsioak egin zituzten. Gaztelekuan batu zirenen zoramenak gorena jo eta jendea ezin geldi egon.
Dirua batzea helburu
Kontzertuen antolatzailea Oñatiko Buru-Hilketa talde gaztea izan zen. Helburua zen materiala erosi ahal izateko dirua batzea. Izan ere, talde berria da Buru-Hilketa eta ez du behar bezalako materialik. 150 lagun elkartu ziren kontzertuetarako eta pozik ziren taldekideak amaieran.