Ordu erdi inguru eman dugu gaur, martitzena, goizean Oñatiko Turismo Bulegoan eta izan da mugimendua: Amoberietako lau txirrindulari egun pasa, Gironatik bizikletaz etorritako beste bat, A Coruñako matrimonio bat eta atzerritar itxurako emakume bat maletarekin. Joan-etorriak hasi dira eta hilabete honetarako badira hainbat talde bisita gidatuetarako erreserba egina dutenak.
Edozein kasutan, zaila da uztaila eta abuztua nola joango diren jakitea. Iaz bertan, esaterako, 4.000 bisiten muga gainditu zuten Oñatin, aurreikuspen guztiak gaindituz. Edozein kasutan, Oñatiko Turismo Bulegoan azaldu digute aurtengo urtean bisita gidatuek harrera ona izan dutela orain arte.
Bisitari gehienak Euskal Herrikoak eta Espainiakoak
Azken urteetako rankinga errepikatzen bada, kataluniarrak izango dira nagusi, madrildarrak gero eta balentziarrak zerrendan hirugarrenak. Eta turismo ohiturek izandako bilakaera ikusirik, espero izatekoa da aurten ere Euskal Herriko eta Espainiako bisitariak izatea inguruotan ohikoenak.
Askotariko aukerak
Unibertsitatea eta parrokia ezagutzeko bisita gidatua saltzen da gehien, baina atzerritik datozenek oinez egiteko ibilbideen gainean ere asko galdetzen dute.
Oñatin bertan izango da berritasunik, ordea, Espeleotxiki Arrikrutzen: sei urtetik gorako umeentzako abentura, Arrikrutzeko kobak azpitik ezagutzeko.
Baina Oñatin bakarrik ez, Bergaran ere bada nobedaderik aurten, orain gutxi inauguratutako Bergara Koloretan ekimena; horren bitartez, hutsik dauden erakusleihoak bergararrek egindako lanekin apainduta topatuko dituzte herriko hirigune historikotik igarotzen direnek.
Uztailean aukera izango da baita ere XI. Jardunaldi Gastronomikoen barruan prestatutako menu bereziak dastatzeko, bertako baratzeetako barazki, euskal baserriko oilasko eta txokolatearekin prestatutako platerak dastatzekoa, alegia.
Eta uztailean zein abuztuan, gura duenak Elgetako ibilbide tematikoan parte hartu ahal izango du; iazko urtean abian jarritako ekimena da hori. Eta azken berrikuntzekin batera, ohiko eskaintza izango da, noski.
Gutxi barru argitaratuko du Mankomunitateak aurtengo turismo gida, baina ikusi egin beharko da gero zer aukeratzen duen bisitariak, poltsikoari begira dagoelako jendea uneotan eta merkeenera jotzen duelako.