Aurtengoa bigarren aldia izan duen Fan Hemendik Egunaren hitzordu nagusia izan zen manifestazioa, baina egitarauak beste hainbat ekintza ere bazituen: 450 lagun batu ziren, esaterako, azokako aterpean egindako bazkarian –trikipoteoa eta kontzertuak ere egin zituzten–, eta horiei beste hainbat batu zitzaizkien arratsaldeko protestan, bertakoak zein bailarako beste herri batzuetatik etorritakoak.
Guardia Zibil jantzita zeuden lagunek eusten zuten pankartaren atzetik, manifestazioak herriko kaleak zeharkatu zituen; Guardia Zibilaren kontrako hainbat oihu egin zituzten parte-hartzaileek ibilbidean, eta salatu zuten, adibidez, "bortxatu, torturatu eta erail" egiten duela: bi lagunek, erdi biluzik, eskuak lotuta eta buruan plastikozko poltsa zutela, tortura irudikatu zuten Bidaurretako biribilgunean, martxa bertatik pasatzen ari zen garaian.
Kuartel aurretik ere pasatu zen manifestazioa, eta orduantxe entzun ahal izan ziren ozenen Guardia Zibilaren kontrako oihuak: ez zen, bestela, apartekorik izan.
Ibilbidearen amaieran, Fan Hemendik batzordeko Iñaki Guridik adierazi zuen "indar okupatzaileek" Euskal Herria uztea lortuko dela eta "herri mobilizazioa" jo zuen horretarako tresna. Guardia Zibila Euskal Herrian dagoen bitartean, helburu diren "bakea eta normalizazioa" lortzea ezinezkoa dela gaineratu zuen.