Mundumirako elkartasun kamisetak turismo bulegoan eta Juanitosa dendan daude salgai 24 eurotan. Saltzen den kamiseta bakoitzeko 3 euro, Debagoieneko gobernuz kanpoko erakundeen proiektuetara bideratuko dute aurten ere, aurreko sei edizioetan egin duten bezala. Aurtengo kamiseta ere Ternua etxeak egin du eta aurreko urteetako diseinu bera jarraitzen du.
Guatemalan
Kamiseten salmentatik ateratzen duten dirua bailarako hiru gobernuz kanpoko erakundek jasoko dute: Oñatiko 7 Udaberri taldeak, eta Arrasateko AMSOGRA eta AMS elkarteek hain zuzen ere. Oñatiko 7 Udaberri erakundeko kideak Guatemalan dihardute lanean, gizartearen eraldaketaren alde eta emakume indigenen eskubideen babesaren alde. Arrasateko taldeak, berriz, Nikaraguako eskualde ezberdinetan dihardute.
Mundumira, munduko kulturen festa, maiatzaren 18tik 20ra egingo da aurten, Leintz Gatzagan eta Eskoriatzan. Aurreko edizioetan bezala, kulturartekotasunaren adibide asko egongo dira aurtengo Mundumira festan. Berritasunen artean, slow food gastronomia azoka dago, produktu ekologikoen azokarekin batera.
