Oñatiko Jose de Azpiazu musika eskolako ikasleek Gernikako musika eskolakoen bisita izan dute gaur eta elkartruke kontzertua eskaini dute Oñatiko Santa Ana antzokian. Aurretiaz ere eginak ziren elkartrukerako saiakerak bi musika eskolak, orain dela hiru urte eta iaz, baina gaur arte ez da posible izan. Horregatik pozik azaldu dira bi musika eskolatako ordezkariak.
Gitarra eta akordeoi doinuak
Guztira 60 gaztetxo elkartu dira gaur; 10 eta 15 urte bitartekoak. Guztiek erakutsi dute euren abilezia. Batzuek gitarrarekin eta beste batzuek akordeoiarekin. Izan ere, emanaldian parte hartu dute bi eskoletako gitarra eta akordeoi taldeek.
Mailaka banatuta jo dute eta Oñatiko gitarrako bigarren mailako ikasleek eman diote hasiera emanaldiari, Arturo Martinezen zuzendaritzapean. Besteak beste: Vivaldiren Winter eta Klaus Badelten Piratas del Caribe abestiak jo dituzte. Ondoren, hirugarren mailakoek egin dute erakustaldia eta aipatzekoa da zein ederki interpretatu duten Henry Manciniren The pink panther.
Ondoren, gernikarren txanda etorri da. Gorka Etxeberriaren eta Eunate Berastegiren zuzendaritzapean gaztetxoek hainbat abesti jo dituzte, esaterako, Bob Powerren 006.
Gitarra doinu goxoen ostean etorri dira akordeoienak. Lehenik, oñatiarrak igo dira taula gainera eta gero, emanaldiari amaiera emateko, gernikarrak. Aipatzekoa da Jose de Azpiazu musika eskolakoek The lion sleeps tonight abestia irudiz lagunduta interpretatu dutela. Gainera, akordeoi-joleek pianianoaren, bateriaren eta perkusioaren laguntza ere izan dute. Gernikarrek, bestalde, oso fin jo dute Steve Reichen Requiem for a dream.
Oroigarria
Emanaldiaren amaieran, Oñatiko Jose de Azpiazu musika eskolakoek gernikarren bisita eskertu nahi izan dute eta oroigarri bat eman diote.