Esmeril harri bat askatu eta kolpeak jasan zituen buruan eta gorputzean gizonezko oñatiarrak. Harrezkero, ospitalean izan da egunetan, koma egoeran, eta zapatuan hil zen. Atzo izan ziren haren aldeko hileta elizkizunak. Bere lankideek egun osoko lanuztea egin zuten atzo, langilearekiko eta haren hurbilekoekiko elkartasuna adierazteko.
Segurtasun neurriak bermatu
ELA eta LAB sindikatuek adierazi dutenez, Gipuzkoan aurten lanean hil den lehen behargina da. Sindikatuek eskatu diete Osalani eta lan Ikuskaritzari gogortzeko lan segurtasunak bermatzeko neurriak. Eta, gogora ekarri dute iaz 64 langile hil zirela lanean zihardutela.
Oñatiko Zubillaga auzoan dago Altuna Hermanos enpresa, 90 urteko enpresa historikoa Oñatin. Inausketa eta lorezaintza lanetarako guraizeak egiten ditu, beste batzuen artean.
Elkarretaratzea gaur
Oñatiko Ezker abertzaleak elkarretaratzea deitu du gaurko, martitzena, 19:00etarako, Oñatiko plazan. "Elkartasun sentikorrena" adierazi nahi dio hildako langilearen familia eta gertukoenei.