Bakarkako kirolari onenaren saria jaso du Xabier Luisek duatloian egindako lanarengatik. Sorian jokatutako Espaianiko txapelketan zortzigarren lekuan bukatu zuen, eta irail bukaeran, Xixonen jokatutako munduko txapelketan seigarren lekuan. Emaitza guztiak 23 urtez azpikoen mailan lortu ditu.
Bestalde, Markel Irizar saritu dute, 2011n bere ibilbideko garaipen garrantzitsuena lortu duelako: Andaluziako Itzulia. Orain dela aste batzuk izandako erorikotik ondo errekuperatu da, eta berak jaso du saria. "Asko eskertu" du.
Entrenatzaile onena eta talde onena
Bakarkako kirola izan arren, talde saria eman diote Aloña Mendiko igeriketa sailari. Euskal Herriko eta Gipuzkoako hainbat txapelketatan lortutako emaitzengatik, baina, batez ere, taldeak egindako ibilbideagatik saritu dute.
Atletismoaren alde egindako lanarengatik, eta Aloña Mendiko diziplina honetako talde guztien entrenatzailea delako azken 16 urtetan, Jabi Gomez izendatu dute urteko entrenatzaile onena. Aloñako atletek 140 domina lortu dituzte 2011n
Luis Mari Etxeberria ere saritu dute. Ziklismoaren alde egindako lana aitortu diote. Beti probak ikusten, argazki kamara lepotik zintzilikatuta.
Sari bereziak
Beste kirol ibilbide bat ere saritu dute: Jon Urtzelairena, alegia. 15 urtez futbol profesionalean jokatu ondoren (Reala, Vecindarioa, Barakaldo, Eibar...), belauneko lesio bategatik erretiroa hartu du.
Iban Altube zena ere omendu dute. Ziklismoarekin eta mendi bizikletarekin zerikusia zuten proba askotan ibilitakoa izan da. Haren alargun Amaiak eta arreba Leirek jaso zuten oroigarria "hunkituta".
Beste aipamen batzuk
Udalak emandako sariez gain, beste hainbat aipamen egin dituzte. Oñatiko kirola "osasuntsu" dagoela esan dute, eta "etorkizun itzela" duela.