Jaietako bigarren egunean, zapatuan, egun guztia izan zuten atseden hartzeko eta hobeto horrela, gaua luzea izango zen-eta. Auzo afarian 40 lagun inguru elkartu ziren eta Urko Egañaren bertsoek ederki asko berotu zuten giroa.
Afalostean erromeria izan zuten eta dantzan egitera ere animatu ziren bat baino gehiago: "Afarian oso gustura egon ginen denok. Auzotar guztiak elkartzeko eguna izaten da eta goizaldeko hirurak arte-edo ibili ginen dantzan eta parrandan. Oso ondo egon zen", kontatu zigun hurrengo egunean Aitziber Gorostizak.
Jaiak, hasi bezala, amaitu ere mahaiaren bueltan egin zituzten atzo Berezaon. Mezu nagusiaren ostean luncha egin zuten eta ehun bat lagun elkartu ziren, auzoko sukaldari finek prestatutako salda beroa, txorizoa eta patata tortilla ederra dastatzeko.