Atzo, martitzena, egin zuten ez-ohiko osoko bilkura. Aretoa lepo bete zen Bilduko zinegotziei, eta, batez ere, Iosu Lizarralderi elkartasuna eta babesa emateko. Lizarraldek, osokoen aretoan bildutako herritarren txalo zaparrada jaso ondoren, hunkituta, eskerrak eman zizkien alkateari, Bilduko gainerako zinegotziei eta Lourdes Idoiagari erakutsitako elkartasunarengatik; eta familiari emandako babesarengatik.
Udal langileen komitea
Bestalde, Udal langileen komiteak oharra kaleratu du Bilduko udal taldeak eta Iosu Lizarraldek jasotako mehatxuen aurrean. Lau puntu ditu kaleratu duten oharrak:
- Udal langileen komiteak udal langileen izenean, gogor salatu nahi ditu BILDU koalizioko udal zinegotzien aurkako kanpaina eta mehatxuak.
- Udal zinegotziak herritarren gertuko ordezkariak direnez, bai herritarrok eta udal langileok babes jarrera tinkoa adierazten dugu.
- Mehatxatzaileek jarrera honekin ez dituzte zinegotziak mehatxatu bakarrik, zinegotziak herritarren ordezkariak direnez, Oñatiko herri osoari ere bota diote mehatxua.
- Egoera latz honetan, udal langileen gertutasuna erabatekoa da.