Igoera hori aplikatuko zaie udal tasa eta zerga gehienei, baina badaude salbuespenak: adibidez, hiri hondasun higiezinen gaineko zergan, orain arte familia ugariek izan duten bonifikazioa emateko prozedura aldatu egin dute. 2012an familiako kideak eta etxeko diru-sarrerak hartuko dituzte kontuan. Bi faktore horiek aintzat hartuta taula bat egin dute eta zenbateko batzuk zehaztu dituzte.
Batzuek %5eko igoera
Trakzio mekanikodun ibilgailuen gaineko zergan bi dira igoera orokorra izango ez dutenak: alde batetik, 14 zaldi fiskaleko ibilgailuek, tartean autokarabanek, %5eko igoera izango dute; eta beste alde batetik, traktoreei tasa erdi preziora jaitsiko zaie. %5eko igoera izango dute baita ere udal jabego publikoaren erabilpenek; Udalaren jabetzakoak diren mahaiek, aulkiek eta oholtzaren alokairuek; eta igeriketa ikastaroek eta ur-ekintzek. Kiroldegiko gainerako tasek%2,82ko igoera izango dute.
Izoztutako tasak
Igoerarik izango ez duten tasak ere onartu zituzten. Izoztu egingo da establezimendu berrien irekitze-lizentziak ematearren ordaindu beharreko tasa. Merkataritza, zerbitzu eta industria eta ostalaritzari dagozkion irekitze-tasak ez dituzte igoko; ezta lur azpiko aparkalekuen tarifak ere.
Irizpide bera tasa askotan
Ordenantza fiskaletan atal baten baino gehiagotan agertzen den bonifikazioa desbabes egoeran daudenendako da: tasa orokorra txikitu egingo zaie familia unitatearen diru-sarreren eta kideen kopuruaren arabera. Irizpide hori aplikatu da, besteak beste, ludotekako, igeriketako, euskaltegiko eta kulturako ikastaroetan.