Realaren partiduak izango zuen agian zerikusia. Edo zubiak. Edo futbolerako baino, paseatzeko egiten zuen eguraldi ederrak. Kontuak kontu, gutxitan izango zen halako partidu luzerik Azkoagainen: ia 100 minutu. Zaleak pozik joan ziren, baina asko sufrituta eta epaileari denetik esan ostean.
Arbitroari atzoko soldata ez pagatzeko eskatzen zioten zaleek Jabi Azpiazuri. Sufritzearren ordaindu egin behar gainera. Etxeko jokalariei sei txartel hori atera zien eta Olaldek zelaia utzi behar izan zuen 94. minutuan bigarren txartela ikusita.
Urrezko hiru puntu
Hori bai, urrezko hiru puntu lortu zuen Andoni Azkargortaren taldeak Real Union indartsuaren kontra. Aurrean aurkari zaila zuten, Realeko atezain izandako Alberto Lopezek zuzentzen duen taldea, sailkapenean hirugarren tokian dagoena.
Lehen zatiko 7. minutuan etorri zen lehen gola, Idigorasek poste ondotik baloia sarera bidali eta gero. Handik gutxira banakoa etorri zen eta 28. minutuan Asier Ugartek sekulako gola egin zuen urrinetik. Aloñak merezita irabazi zuen. Real Union batez ere azken minutuetan estutu zuen, epailearen laguntzaz. Aloñak sendo eutsi zion lehen garaipenari.