Lehen aldiz parte hartu du Leire Mugartzak halako lehiaketa baten. Ze irudi egin erabakitzerako orduan esan zuen aurreko urteetan egindako azalak hartu zituela kontuan: "Ikusi nuen txantxikua behin eta berriz agertzen zela, eta erabaki nuen bestelako irudia egitea. Jaietako egun bakarra aukeratu nuen, eta Herri Eguneko adierazgarriena hartu nuen: baserritarrak. Lehen zirriborroan baserritarren lepoko eta buruko zapiak eta txapela margotu nituen. Beste hainbat zirriborro egin nituen, baina, azkenean, lehena aurkeztu nuen", esan zuen.
Manu Egaña kultura zinegotziak esan zuen Leire Mugartzaren irudia aukeratu zutela "klasikoa eta, era berean, berritzailea" zelako.
Helduen mailan 14 lan aurkeztu zituzten, eta umeen mailan zortzi. "Umeen mailan parte hartu duten guztiei oparia emango diegu: Arrikrutzerako sarrera, bisera eta liburuxka jasoko dute", esan zuen Egañak.
Jaietako zapiak
Bestalde, esan zuen Mugartzak egindako irudia jaietako zapietan ipiniko dutela. "Herriko tabernatan eta txosnatan egongo da salgai. Gure asmoa da 3.000 bat zapi egitea. Baina, harrera ona badute, akaso gehiago egin beharko ditugu", esan zuten.