Aspaldiko partez jai eguna; Foru aldundian eta Oñatiko Udalean agintari berriak, Bildukoak; eta, Ulmaren 50. urteurrena ospatzeko, musika emanaldia plazan. Horiexek aurtengo berritasunak, jai egun handiaren osagai garrantzitsuenak.
Erromesaldia 7etan
Bestelakoan, eliztarren erromesaldiak, bederatziurrenari amaiera emateko. Goizeko 7etan abiatuko da San Migel parrokiatik. Arantzazuko fraideek bat egingo dute haiekin 8etan Zapatan, eta elkarrekin igoko dira goraino, Arantzazuko lautadara 9:15erako heltzeko. Kantak, otoitzaldiak, gogoetak, poemak, bertsoak… izango dira ibilaldian. Eta, gero, 12:00etan, meza nagusia Munilla gotzainarekin.
Agintariak eta presoen senideak
Foru gobernuko bozeramailea, Larraitz Ugarte, eta gobernuko beste ordezkari batzuk, eta Oñatiko alkatea eta udalbatzako beste zinegotzi batzuk, bertaratuko dira, baina, seguruen, ez dira mezara sartuko; ez, behinik behin, Diputazioko bozeramailea eta alkatea. Eusko Jaurlaritzako ordezkariak ere espero dituzte, baina ez lehendakaria; seguren, Idoia Mendia bozeramailea izango da bertan, azkeneko urteotan bezala. 11:30ean, presoen aldeko elkarretaratzea egingo dute senideek eliz atarian, ohiko moduan.
Donostiako Orfeoia eta Bilboko Udal Musika Banda
Ulma Taldea ospakizunetan dago urte osoan. Oraingo astean ere hainbat ekitaldi antolatu dituzte eta, ginda, bihar iluntzeko musika emanaldia izango da. Plazan, 1.200 aulki jarriko dituzte Donostiako Orfeoiaren eta Bilboko Udal Musika Bandaren emanaldirako. 21:00etan hasiko da kontzertua. 150 abeslari eta instrumentu jotzaile espero dituzte oholtza gainean. Jose Antonio Sainz Alfaro izango da zuzendaria. Emanaldiak 90 minutu iraungo ditu.
Oñatiar bat Donostiako Orfeoian
Esteban Urtzelai oñatiarra, urteetan Ganbara abesbatzako eta Donostiako Orfeoi Txikiaren zuzendari izan dena, ere izango da Orfeoiarekin bihar herrian. 2006a ezkero Donostiako Orfeoian abesten du. "Oñatira itzultzeak ilusio handia egiten dit" adierazi du.