Egubakoitzean, 19:00etan herriko plazan
Txinatik zuzenean etorrita Taiyuan Cicus taldeak ordubete pasatxo jardungo du Oñatiko plazan. Aurten bete ditu Txinako akrobazia taldeak 55 urte; urte guzti horietan, euren akrobazia tradizioa mundu guztian zehar erakusten ibili dira. 150 lagunek osatzen dute taldea, baina Oñatira 14 besterik ez dira etorriko –10 akrobata eta lau laguntzaile–. Beste behin ere Txinako artea doan ikusteko aukera egongo da Oñatin.
Zapatuan, San Anton plazatxoan 22:30ean
Murtziako La Banda del Pepok Tanto por hacer disko berria aurkeztuko du San Anton plazan. 1999an sortutako taldea da, eta lehen lana 2005ean argitaratu zuten. Euren musikak soinu mediterraneoa du, eta egiten dituzten abestiek gizartearekiko ikuspegi kritikoa dute, usain urbanoaz bustitako abestiak eginez. Flamenkoa nahiz soinu ipar afrikarrak egiten dituen talde dotorea da.
La Banda del Peporekin batera Kubako Yima Orozcok jardungo du zapatuan. Santa Clarako abeslariak bere bigarren diskoa aurkeztuko du. 30 urte besterik ez dituen arren, trobaren promesa handia bezala ezaguna da Orozco. Kubako doinu tradizionalak eta pop garaikidea uztartzen ditu bere abestietan.
