Programa honek bi helburu ditu: alde batetik, datozen atzerriko bisitariei –batez ere ikasleak, baina baita irakasleak eta ikertzaileak ere– Oñatiko eguneroko bizitzan integrazioa bideratzea eta erraztea. Beste alde batetik, programan parte hartzen duten herritarrei kultura berri bat ezagutu, edota atzerriko hizkuntza bat praktikatzeko aukera ematea.
Herriko ikastetxeekin lanean
Herritarrek ondo erantzun diote Lege Soziologia Institutuak egindako deialdiari. "Oraingoz 15 bat lagun ditugu, baina deialdia hedabideetan kaleratzen denean, askoz gehiago animatuko dira. Oso gustura gaude jaso dugun erantzunarekin", esan digu programako arduradun Susana Arresek. Bestalde, gaineratu digu, herriko ikastetxeekin indartu egingo dutela programa: "Ikastetxeak gurekin hartu-emanetan jarri dira, euren ikasleek masterrekoekin ekintza ezberdinak egin dezaten".