"Ez nuen horrenbeste jende espero. Ez al dago beste planik Oñatin?". Hitz horiexekin ekin zion Eneko Burzakok, MobyDick izen artistikotzat, egubakoitz iluntzean Antton tabernan eskaini zuen kontzertuari. Izan ere, bakarlariak bildu zuen jendea. Antton taberna bete egin zen bere emanaldia ikusteko.
Kanta propioak eta bertsioak abestu zituen. Adibidez, Leonard Cohen-en hitzak hartu zituen bere ahotan. Bertsio benetan bereziak egin zituen.
Giro goxoa
MobyDickek kontzertua benetan giro goxoan eskaini zuen: tabernako pertsianak jaitsita eta leihoak izarekin estalita argi izpirik ez sartzeko; tabernako argiak itzalita, abeslaria argiztatzen zuen argi bakarraz; eta aulkiak eta bankuak ikusleentzat. Abeslariaren ahots indartsua entzuteko eszenatoki paregabea.
Teknologiak huts egiten duenean ere, bere ahotsaren indarra eta gitarrarekin duen abilezia nahikoa direla erakutsi zuen MobyDickek. Izan ere, anplifikadoreak kale egin zion eta ahots hutsean kantatu zuen abesti bat, zirraragarria.
Beste bat
Amaieran beste bat, beste bat... "Eskaerarik?" galdetu zuen MobyDicek. Orduantxe abestu zituen euskaraz bi abesti: bata Anarirena eta bestea Mikel Laboarena. Ikus-entzuleek eskatu eta berak kantatu. Laboaren bertsioaz txundituta utzi zituen tabernan zeudenak. Erakutsi zuen indarra erakutsita, ziur hurrengo emanaldian ere bete egingo duela aretoa.