Iñaki Olalde bertso eskolako kideak azaldu du euskaraz eta bat-batekotasunean oinarritutako ikuskizuna dela. "Aktore bat eta bertsolari bat, hitzekin jolasean, elkarren kontra, baina elkarri lagunduz, lehian baleude bezala. Ikuskizunak antzerkia eta bertsolaritza uztartzen ditu modu inprobisatuan; gertukoa, umorez betea eta era interaktiboan", dio Olaldek.
Aktorea eta bertsolaria
Aktore lanetan Ander Lipus ibiliko da eta bertsolaria Andoni Egaña izango da. Unai Elizasu izango da gai-jartzailea. Gaur egun plazarik plaza gehien dabilen gai-jartzailea da Elizasu, eta baita www.gaijartzailea.com atariaren egilea ere. Gaurkotasuneko gaiak jorratuko dituzte.
Bertso eskolak urtean bi bertso saio antolatzen ditu pilotalekuan. Irailean ohiko den San Migeletako bertso saiorik ez dute egingo aurten, urri erdi inguruan Gipuzkoako Bertsolari Txapelketako saio garrantzitsu bat Oñatin jokatuko delako. Hala, oporren aurretik beste ekitaldi hori antolatzeko ideia izan dute. Gainera, adierazi dute aurrerantzean ere ekitaldiak antolatzea dela euren nahia.