ARTaso elkartea
ARTaso elkartearen helburua, artea sustatzea da. Arantzazun eta Oñatin arte adierazpide ezberinak sustatzeko asmoz sortu zen, 2007an; besteak beste artisautza, pintura, literatura eta eskulanak. Artelanak jendeari hurbiltzeko tailerrak, eskulangintza-azoka, erakusketa eta bestelako ekintzak antolatzea da elkarte honen xede nagusia.
Aurkezpen ekitaldia 2008ko uztailaren 27an izan zen Gandiaga Topagunean. Urte horretan, eskulangintza, birziklatze tailerra eta eskulanen erakusketa antolatu zuten.
Bigarrenez, 2009ko Santiago egunean antolatu zuten azoka. Urte hartan, artzaintzarekin gaiarekin lotu zuten, horren inguruko hainbat lanen erakustaldiak prestatuta. Artilearen inguruko prozesu guztiak erakutsi ziren, artilearekin eginiko eskulanak, larrugintza, abarkak eta erakusketa etnografikoak, besteak beste.
2010ean, berriz, naturarekin zerikusia zuten gaiekin girotu zuten azoka. Gaiarekin lotutako liburuak erakusteaz gain, ezti eta gaztagintzako tailerrak, taila, saskigintza, xaboi, eta kaikugileak egon ziren; trikitilariek alaitu zuten giroa.
