Soinuarekin bakarka, soinu eta pandero, taldean... Hori bai, denak Arkaitz Allur irakasleak lagunduta. Oñatiko Jose de Azpiazu musika eskolako trikitixa eta pandero ikasle gehienak pasatu ziren atzo San Anton plazako eszenatokitik. 55-bat soinu ikasle eta 20 inguru pandero-jole ari dira egun musika eskolan, eta denek hartu dute parte abesti herrikoiekin osatu duten maketan. 35 pieza dira guztira, eta atzokoa doinuon jendaurreko aurkezpena izan zen.
Jendetxoa batu zen San Anton plazan saioa entzun eta ikusteko. Umeekin hasi eta ikasle helduetaraino, adin guztietakoek hartu zuten parte emanaldian. Izan ere, denetarikoak ditu Oñatiko musika eskolak, soinuak eta panderoak herrian hartu duten indarraren erakusle. Trikitixa eta pandero ikasleen maketa laster egongo da salgai musika eskolako idazkaritzan, sei euroren truke.