Xabier Martiarena Arte Lekuko arduraduna, Joxan Larrañaga San Migel parrokiako parrokoa, Maria Jesus Aranburu Kultura eta Euskara foru diputatua, Lourdes Idoiaga Oñatiko alkatea eta Sebastian Agirretxe, irudia jaso zuena egon dira gaur San Migel parrokiako ekitaldian.
Ezin dute zehaztu noiz ostu zuten
Orain dela urte batzuk ostu zuten irudia, baina ezin dute zehaztu ze urtetan izan zen hori. Dakitena da, 1926an 6 iruditxo zeudela erretaulan, eta azken urteetan, ostera, lau besterik ez direla egon.
Sebastian Agirretxeri eman zioten
Orain dela hilabete batzuk ezezagun batek Sebastian Agirretxeri eman zion irudia; hala, Agirretxek esker oneko hitzak besterik ez ditu izan pertsona horrekiko. Otsaila erdialdetik apirila erdira arte zaharberritu dute irudia. Lan horretan ibili dira Xabier Martiarena eta Nerea Bermudez. 60 zentimetroko irudia da, eta zaharberritzen ibili direnek esan dute nahiko zikin zegoela, eta horregatik polikromia lanak egin behar izan dituztela.
Ate irekiak egingo dituzte irudia ezagutarazteko
Parrokoaren asmoa da ate irekiak egitea herritarrek irudia ikus eta ezagut dezaten. Zapatuko elizkizunaren ondoren egingo dute jardunaldi hori, baina ez dute zehaztu ze zapatutan izango den. Bestalde, irudia bere lekuan jartzeaz Etxezarreta arotz oñatiarra arduratuko da; lehenbailehen egingo du lan hori.