Aurrean ibiliko diren korrikalarien artean egongo da Walter Becerra, Aloñan errekorra duena, eta azken bi urteotako edizioa irabazi duena. Aurreratu moduan, baina, lasterketan parapentearekin parte hartuko duten 30 lagunak izango dira nobedadea.
Horiek Urtiagainen hasiko dute lasterketa –ordu berean– eta Aloñaraino parapentea bizkarrean dutela igoko dira, handik salto egiteko. Ondoren, Landetako zelaian lur hartu eta parapentea batu ostean beste korrikalariek moduan plazako helmuga zeharkatu beharko dute.
Horretarako, baina, eguraldiak lagundu egin beharko du, euria egiten badu ezingo dutelako hegan egin. Eta, euria ez bada ere, haize zakarra baldin badago tontorretik belarrera jaitsiko dira korrika, han aireratzeko.
Ikusgarria izango da
Antolatzaileek adierazitakoaren arabera, oso gaitza da 30 lagun batera hegan egiten ikustea, eta oso pozik azaldu dira parapenteko probak izan duen harrerarekin.