"Gure ardats nagusia pertsonak dira: hemen jaio eta kanpotik etorri direnak. Horien guztien alde lan egingo dugu", esan zuen Idoiagak. Joseba Egibarrek Idoiagaren esfortzua eskertu zuen.
Oñatiko EAJk Lourdes Idoiagaren hautagaitza aurkeztu zuen kultura etxean egindako ekitaldian. Idoiagak esan zuen jeltzaleen programak bost ardatz nagusi dituela: pertsonak; gizarte politika; ingurumena eta landa garapena; irisgarritasuna; eta kultura, kirola eta turismoa. "Lehentasunetako bat gizarte politika izango da; izan ere adinekoak ingurukoen zaintzapean jarrai dezaten nahi dugu, egoera larrian eta bazter egoeran daudenak babestuko ditugu, eta enpleguaren sorrera sustatuko dugu", esan zuen Idoiagak.
Bestalde, hondakinen sorrera murrizteko bosgarren edukiontziaren alde egingo dute esan zuen, eta energia jasangarriak garatzeko Ekintza Plana garatuko dutela. Landa garapenari buruz zera esan zuen: "Gure arduretako bat da. Landa auzoen hobekuntzan lana egiten jarraituko dugu, eta nekazaritzan zein abelatzaintzan enplegu sorrera sustatzeagatik hobariak emango ditugu".
Irisgarritasuna
Irisgarritasunaren arloan esan zuen, herri mugikortasun jasangarria bultzatzen jarraituko dutela. Gaineratu zuen, Errekalde eta San Lorentzo auzoetan hobekuntzak egingo dituztela, eta bidegorri sarea osatuko dutela. Azkenik kultura, kirola eta turismoaren gainean egin zuen berba. "Gazteendako gune eta programa berriak eratuko ditugu, eta gune irekietan azterketa bultzatuko dugu aisialdi eta kirol guneak berreskuratzeko. Gainera, turismoaren plan estrategikoaren inguruko ekintza egiten jarraituko dugu".
Joseba Egibarren hitzak
Gipuzku Buru Batzarreko presidenteak Idoiagaren esfortzua "eskertu" zuen, eta esan zuen herrigintza lan egiterakoan "ez zaie beldurrik eduki behar ez herriari ezta herritarrei ere. Herritarrak ekintzaile bihurtu behar ditugu. Abertzaletasunak aurrera egiten badu elkartasun eta lan horri esker izango da".
Amaitzeko Egibarrek zera esan zuen: "PP eta PSE estatu estrategia baten sartuta jarraitzen duten bitartean, guk gureari eutsi behar diogu; herriz herri, bailaraz bailara, gure modeloa jarraitu beharrekoa dela erakutsiko dugu".
EAJren zerrenda
1. Lourdes Idoiaga
2. Ainhoa Galdos
3. Angel Biain
4. Andoni Gartzia
5. Jabi Baltzategi
6. TIna Kortabarria
7. Faustino Aranburu
8. Angel Mari Biain
9. Amaia Erostarbe
10. Miren Elgarresta
11. Marijo Etxegoien
12. Aitor Arregi
13. Nerea Altube
14. Mikel Gartzia
15. Mireia Arregi
16. Jabier Galartza
17. Luis Anduaga
18. Arrate Markiegi
19. Nekane Maiztegi
20. Jose Antonio Urteaga