Ibilbide horiek homologatuak izaten jarraitu gura badute, euren egoera hobetu egin beharko dute; hain justu ere, urtero ibilbideen mantentze-lana egin behar da. Oñatikoen kasuan, Udala arduratuko da horretaz. "Udala da herriko bidezidorren sustatzailea eta hari dagokio bide horien mantenua egitea. Hori horrela, Gipuzkoako Mendi Federazioarekin bost urterako konpromisoa hartuko du, ibilbide horien mantentze-lanak egiteko", dio turismo zinegotzi Ernesto Murgiondok. Federazioak, berriz, konpromiso hori betetzen dela egiaztatzeko, Gipuzkoako ibilbide batzuen azterketa egingo du urtero. "Bost urteak pasatzen direnean ibilbide guztiak begiratuko dituzte berriro ere, hobekuntza horiek egin diren ikusteko. Hori horrela ez bada, bidezidor hori ibilbide homologatuen zerrendatik kanpo utziko dute", azaldu du Murgiondok.