Espainiako mendi federazioetako ordezkariek eta naturgune babestuetako kudeatzaileek Arantzazun egingo dute aurten bi urtean behin egiten duten mintegia. VI. mintegia izango da eta apirilaren 8, 9 eta 10ean egingo da. Bi testu adostuko dituzte: 'Mendiko lasterketak naturgune babestuetan' izango da lehena; eta bigarrena, 'Nola uztartu mendiko kirolak eta erabilera tradizionalak', hesiak zabalik uzteak edota gisa horretan zenbait kirolarik izan ohi dituzten portaerek baserritarren haserrea eragiten dutelako maiz.
Apirilaren 8an, egubakoitza, inauguratuko dute mintegia, Oñatiko kultura etxean, 19:00etan. Asmoa da bertan izatea Landa Ingurunearen Garapenerako diputatu Rafa Uribarren, Oñatiko alkate Lourdes Idoiaga eta Espainiako Mendi Federazioko presidente Joan Garrigos. Mintegia bera apirilaren 9an, zapatua, egingo da Arantzazun. Eta 10erako, domeka, mendi irteera prestatu dute Arantzazu eta bere inguruak ezagutzeko.
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Batu zaitez Goiena albisteen kanalera.
TELEGRAM: Batu zaitez GoienaAlbisteak kanalera.