Orain dela bi urte azaldu zuen Diputazioak Gipuzkoako lau herritan - Zarautzen, Zegaman, Elgoibarren eta Oñatin- esperientzia pilotu bat abiarazteko asmoa: jabetza publikoko eraikinen teilatuetan eguzki plakak jartzea, horiek herritarrei saltzea eta hortik ateratako etekina herritarrei ematea. Horrela, herritarrak ere energia berriztagarriak sortzeko prozesuaren parte bihurtzeko eta etekina ateratzeko. Bada, dagoeneko instalatu dituzte lau herrietan plaka fotoboltaikoak eta atzotik bertatik herriarenak dira.
Hori baina ez da Oñatiko Udalak energia berriztagarrien alde egin duen lehenengo apustua; orain bost urte jarri zituen lehenengoz eguzki plakak herriko hainbat eraikinetako teilatuetan eta esperientzia berri horren aurretik bazituen 3.000 metro kuadro eguzki panelekin.
Esperientzia berria
Oraingo esperientziarako, eguzki plaka berriak jarri dituzte Zubikoa kiroldegiko eraikin berriaren teilatuan eta azokakoan, eta Diputazioak ordaindu ditu gastuak. Orain, plakak instalatuta eta martxan daudela, asmoa da plaka horiek herritarrei saltzea 800 eurotan eta herritarrek eurek energia berriztagarrien parte izateaz gain, gutxi gorabehera %6ko etekina ateratzea.
Modu horretara, petroliotik datozen energiak, energia berriztagarriengatik ordezkatu nahi dituzte eta momentuz, plaka horien salmentak egiten ez diren bitartean ateratako etekinak, herriarendako izango dira.
Bilera informatiboa, hilaren 15ean
Horri buruzko informazio gehiagorako eta herritarren kezkak argitzeko, Diputazioko teknikariak etorriko dira Oñatira martxoaren 15ean eta informazio guztia bertan emango dute zehatz-mehatz.
Beste apustu bat
Energia berriztagarrien aldeko beste apustu bat egitea ere ari da aztertzen Oñatiko Udala: biomasaren bidez beroa sortzea posible den edo ez aztertzen, hain zuzen. Proiektu hori aurrera aterako den edo ez erabakitzeke dago oraindik; azterketaren emaitzen arabera hartuko dute erabakia.