Partiduko aurreneko minutuetan kanpoko jaurtiketetan ondo ibili ziren bizkaitarrak, eta defentsan Aloñakoen barruko jokoa bikain geratzea lortu zuten gainera. Hori ikusita, kanpotik jaurtitzeari ekin zioten oñatiarrek ere, baina eskumuturra ez zuten nahikoa bero antza: "Lehenengo zatia hiru hirukorekin amaitu dugu, eta hiruko marratik huts asko eginda", zioen amaieran Xabier Igartua Sustrai Aloña Mendiren entrenatzaileak.
Oñatikoek gainera baja garrantzitsuak zituzten zapatuan, eta horri gehituta Iñigo Biainek agudo pilatu zituela faltak, normalean minutu gutxi izaten dituzten jokalariek protagonismo berezia hartu zuten, eta ohi baino lehenago gainera, bigarren laurdenerako: "Ezohikoek oso maila ona eman dute, eta lortu dugu atsedenaldira puntu asko atzetik ez joatea".
Emaitza 39 eta 43 zen lehen bi laurdenen amaieran. Bigarren zatian nabarmen hobetu ziren etxekoen jaurtiketa portzentajeak, eta beste alor guztietan ere hobera egin zuen gorrien jokoak.
Bizkaitarrek, ostera, ez zuten lehenengo zatian adina asmatu –atsedenaldirako zortzi hiruko zituzten sartuak–, eta Igartuaren mutilek hartu zuten jokoaren kontrola. Horretan zeresana izan zuen defentsa gogortu izanak ere, errebotean nagusituz. Hirugarren laurdenean 15 puntu inguruko aldea hartu eta estuasunik gabe amaitu zen partidua Sustrai Aloña Mendirentzat.