Munduko ziklo-kros txapelketaren testigu izandakoak dira Oñatiko San Martingo belardiak eta dagoeneko 44 urte pasa dira Oñatin nagusien azken ziklo-kros lasterketa antolatu zutenetik.
Zirkuitua
Biharko, zapaturako, prest izango dituzte Aloña Mendiko kideek bi kilometro eta erdiko zirkuitua. San Martin zuhaiztian hasiko da lasterketa eta ondoan dauden bi zelaitan gora eta behera ibiliko dira txirrindulariak.
Hiru kategoria
Hiru kategoriatako probak egingo dituzte: kadete, gazte eta master kategoriako ziklistak izango dira, hain zuzen. Eta etxeko proba izanda, oñatiarrak gogotsu daude. Herriko bost ordezkarik hartuko dute parte ziklo-krosean: kadetetan Iker Alberdi ibiliko da; gazte mailan Iker Arkauz; eta masterretan Iñaki Barrena, Xabier Altube eta Roberto Zugasti.
Aurtengo lasterketetan ez dira elite mailako txirrindulariak egongo, izan ere, poliki-poliki hasi nahi dute eta gainera elitekoentzako beste aurrekontu bat behar da.
Proben ordutegia
-10:00 Kadeteak (30 min)
- 11:00 Gazteak (40 min)
- 12:00 Masterrak (60 min)
- 13:00 Sari banaketa