Argazki lehiaketako sari onenak oñatiarrendako

Mireia Bikuña 2010eko abenduaren 17a

Aloña Mendi mendi taldeak deitutako VII. mendia eta natura argazki lehiaketako sari banaketa ekitaldia gaur egingo dute kultura etxean, 19:00etan. Ekitaldian egongo dira irabazle guztiak; besteak beste, sail bakoitzeko lehen saria lortu duten hiru argazkilari oñatiarrak: Josu Garai (mendia eta natura atala), Jokin Astigarraga (denuntzia edo salaketa) eta Iñaki Idigoras (alpinismoa). Gainera, epaimahaiak, atal bakoitzeko oñatiar argazki onenak aukeratu ditu: Jose Ramon Txintxurretarena (mendia eta natura atala) eta Iñaki Idigorasena (denuntzia edo salaketa) izan dira onenak.

Sari banaketa ekitaldiaren ondoren, lehiaketara aurkeztu dituzten argazki onenekin osatutako erakusketa zabalduko dute. Ikusgai egongo da urtarrilaren 2ra arte, egunero, 18:00etatik 20:00etara. Abenduaren 24an, 25ean eta 31n, eta urtarrilaren 1ean itxita egongo da.

186 erretratu

Guztira, 55 argazkilarik egindako 186 argazki jaso ditu Aloña Mendi mendi sailak lehiaketarako; iaz baino, 31 gehiago (2009an 155 jaso zituzten). Horietatik 142 mendia eta natura atalean lehiatu dira (iaz 111), eta gainerako 44ak denuntzia edo salaketa atalean (iaz 44 erretratu).
Epaimahaia osatu dute Ikatza argazki taldeko Xabier Mata legorretarrak eta Ezkio-Itsasoko Asier Azarolak, eta Bergarako Pol-Pol argazki taldeko Juan Jose Lopez Azurmendik.

Kirola Oñati

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Batu zaitez Goiena albisteen kanalera.

TELEGRAM: Batu zaitez GoienaAlbisteak kanalera.

Harpidetza aukera guztiak