1983 eta 1992 urteetan Zubillagan egondako uholdeak berriro errepika ez daitezen, Altuna enpresa ondoko eta trenbide zaharreko zubiak bota egingo dituzte.
18 metroko zubi berria
Zubillagako Altuna ondoko lanak bi zatitan egingo dituzte LKS enpresak egindako proiektuaren arabera. Egunotan erreka bazterreko sastraka eta zuhaitzak kendu dituzte, eta hasi dira erreka zabaltzen. Lehen fasean, su-hiltzaileen egoitza parean hasiko den 18 metroko zubi berria egingo dute. Sei metroko altuera izango du, eta zortzi metroko zabalera. Zubiaren kanpoaldean 2,26 metroko espaloiak egingo dituzte. Ezaugarri abangoardistak izango dituen zubi berria egin ondoren, Altuna enpresa ondoko eta trenbide zaharreko zubiak bota egingo dituzte.
Bigarren fasean, Altuna ondoan dagoen presako kota jaitsi egingo dute; hain zuzen ere, 2,6 metrora. Era berean, erreka bazterra indartzeko harrizko pareak jarriko dituzte Zubillagako zubiaren pareraino.