Lanak hiru fasetan
Udal arduradunek Garagaltza eta Zañartu arteko errepidean argiteria publikoa ezartzeko proiektua eskatu diote Miguel Angel Nuñez ingeniariari, eta proiektuaren, lanak hiru fasetan egingo dituzte: lehenengo fasean, Etxe Aundi jatetxetik Mugartza baserrirainoko argiteria jarriko dute Iberdrolak dituen zutabeak aprobetxatuz; bigarrenean, Mugartzatik Zuazolako errotarainoko –zubia pasa barik– argiteria jarriko dute; eta hirugarrenean, Zuazolatik hilerrirainokoa –zubia pasa ondoren. Era berean, lanok egiteko onartutako aurrekontua hiru zatitan banatuko da: lehen fasean jarriko dituzten zortzi argiontziekin 9.982 euro gastatuko dituzte; bigarren fasean 32 argiontzi jarriko dituzte eta 77.300 euro erabiliko dituzte; eta hirugarren fasean 38 argiontzi jarriko dituzte, 72.051 euroko aurrekontuarekin. Guztira, beraz, 159.332 euro gastatuko ditu Udalak argiteria ipintzeko.
Argiztatze lanak egiteko Foru Aldundiaren baimena jaso ondoren zehaztuko dute lanak nork egingo dituen eta noiz hasiko diren.