Guztiak maila berean
Parte-hartzaileek 7,5 kilometro egin beharko dituzte; hain zuzen ere, San Pedro-Olate-San Pedro ibilbidea egingo dute. Korrikalari guztiak maila berekoak izango dira, federatuta egon edo ez. Parte hartzeko bete beharreko baldintza bakarra 1994. urtean edo aurretik jaio izana da. Helmugako denbora kontrola irteera hartu eta ordubetera itxiko dute.
Lasterketa bukatu ondoren, sari banaketa egingo dute Etxe Aundi jatetxearen ondoan. Gizonezkoen eta emakumezkoen sailkapeneko lehengo hirurek opariak jasoko dituzte, eta irabazleek Antxintxiketan Elkartearen txantxikua. Gainera, sailkapeneko lehen oñatiarrak urdaiazpiko bat irabaziko du.
Iaz, beroa nagusi
Iazko Torreauzoko krosak bi ezaugarri nagusi izan zituen: inoizko kros herritarrena izan zen; eta, aspaldiko partez, beroena. 114 korrikalarik parte hartu zuten nagusien mailan, eta 24k gaztetxoen proban. Manu Hurtado beasaindarra (25.42) eta Isabel Ramos (33.04) oñatiarra izan ziren azkarrenak.