Vasconiari 0-2 irabazita konfiantza eskuratu du Aloñak

Donostiara joan ziren atzo arratsaldean oñatiarrak, Vasconia taldearen aurka jokatzera. Irabazi beharra zeukaten joan zen asteko porrota ahaztu eta indarrak eskuratzeko eta halaxe egin zuten; 0-2 gailendu ziren.

Lehenengo zatian oso parekatuta ibili ziren bi taldeak, eta oñatiarrak urduri, golik ez zelako iristen: "Antzera ibili gara, baina geu eskasago; ezin asmatu zelaian", adierazi zuen Josu Zubia entrenatzaileak.


Golak bigarren zatian iritsi ziren Roberren eskutik. Lehen golak lasaitasuna eman zien oñatiarrei: "Baloia lasaiago jokatu dugu golaren ostean eta gora egin dugu orduan. Horixe zen behar genuena konfiantza berreskuratzeko". Hala zebiltzala bigarren gola ailegatu zen eta behin konfiantza hartuta gehiago ere izan zitezkeen partidua bukatu bitartean.

Etxean irabaztea helburu

Datorren astean Trintxerpe hartuko du etxean Aloñak, eta partidu ona egin gura du zaleen aurrean: "Golik jaso barik bukatu beharra geneukan, denok lasaitzeko eta halaxe izan da oraingoan. Hortaz, etxean jasotako gol zaparrada guztiz ahaztuta, gogotsu gaude hurrengo partidurako eta konfiantza handiarekin", dio Zubiak. Lau puntu dituzte oñatiarrek –Bergararekin berdinduta– eta orain etxean irabazten hastea dute helburu.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.