Urtarrilean estreinatuko dituzte Txantxiku Ikastolako gela berriak

475 metro koadroko eraikinean 0-12 urteko ikasleendako sei gela berri egingo dituzte: lehen solairukoa 177,40 metro koadrokoa izango da, eta beste biak, 148,80 metro koadrokoa bakoitza; eta solairu bakoitzean hiruna gela egingo dituzte: lehenengoan, 0-3 urte artekoendako; bigarrenean, 3-6 urte artekoendako; eta hirugarrenean, 6-12 urtekoendako. Eguaztenean hasitako kurtso berrirako, lehendik zeuden gela batzuk egokitu dituzte.

Sarrera-irteeretan aldaketak

Jolaslekuan egiten diharduten lanek beste aldaketa batzuk ekarri dituzte kurtso hasieran; alegia, ikastetxeko ikasleen sarrera-irteerak moldatu egin dituzte, jolaslekuko atea itxita egongo da-eta. "Haur Hezkuntza eta Lehen Hezkuntzako lehenengo eta bigarren mailetako, eta autobusa erabiltzen duten ikasleek haurtzaindegiko sarrera erabili beharko dute. Aldiz, Lehen Hezkuntzako hirugarren mailatik gorakoen San Juan kale aldera dagoen atea erabiliko dute", esan digu Jabi Agirrek.

Jolaslekua, txikiagoa

Eraikin berria bukatzen dutenean jolaslekua txikiago geratuko da. "Egia da txikiagoa geratuko dela; baina jolaslekuaren espaziorik erabilienak, hau da, estalpea eta pilotan eta futbolean egiteko guneak ez dira aldatuko. Dena den, jolas-orduetarako beste gune batzuk aztertzen gabiltza".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.