Gaur, egubakoitza, zabaldu behar zituzten kirol instalazio berriak baina urriaren 1a arte atzeratu dute. Kirol zerbitzuak azaldu duenez, "erabiltzaileen mugimenduak antolatu beharrak eta ikastaroak zein material berria prestatu beharrak" atzeratu du irekiera. Bestalde, aipatzeko da hiru zati ezberdin daudela Zubikoaren alde berrian. "Atzeratu dena da bakarrik kirol instalazioen eremua. Aparkalekua orain zabalduko dute eta tabernak oraindik ez du irekiera datarik", zehaztu du Gerardo Eskarza kirol teknikariak. Urriaren 1ean zabalduko dutena da: pista berria, bi gimnasio eta lehen taberna zegoen tokian jarriko duten karate aretoa.
Aparkalekuak
Bestalde, Zubikoako aparkalekua eta Kalegoienakoa, biak zabalduko dituzte aste honetan. Kiroldegiko aparkalekuan 101 autorendako tokia dago eta Kalegoienakoan 71ndako. Udalak oraindik ez du arautegia onartu eta hori egin arte doan izango dira aparkaleku biak.