Ulma Taldeko presidente den Xabier Mugarzak eta Estepan Plazaola, Goiena Komunikazio Zerbitzuen presidenteak, hartu dute parte bi enpresen arteko lankidetza akordioaren sinadura ekitaldian.
Lankidetza akordio honi esker, Ulma Taldeko langileek Asteleheneko Goienkaria-ra harpidetu ahalko dute merkatu prezioaren erdian eta beste erdia, bi enpresen artean jarriko dute.
Estepan Plazaolak adierazi duenez, gaurko hitzarmena bat dator Goienaren plan estrategikoko ildoekin, hau da, lana inguruko eragileekin eta inguruko eragileentzat egitearekin. Gaineratu du, gaurkoa bezalako ekimenek, aurrera begirako helburuak lortzea errazago egingo dutela. Plazaolak esan du era berean, epe ertain-luzera, Goienaren helburua dela Asteleheneko Goinekaria ordaindutako ibarreko egunkari salduena izatea dela.
Xabier Mugarzak bere aldetik esan du lortutako akordioak Ulma Taldeak euskararekin eta inguruarekin duen konpromisoa uztartzen dituela, Asteleheneko Goienkaria-k Debagoieneko albisteak euskara hutsean lantzen ditu-eta.
Sinatutako hitzarmena 2009ko urtarrilaren 1ean jarriko da indarrean, eta urtebeterako izango da. Dena den, bi aldeek adierazi dute lortutako akordioa etorkizunean luzatu eta sendotzeko asmoa.