Izenak, hiru ataletan
Santa Ana antzokiko beiratean jarri den zerrendako izenak hiru ataletan banatu dira, uztailean egingo den zozketak hiru atal izango ditu-eta.
- Lehenengo zerrendan, elbarrituendako egokitutako etxeen zozketan parte hartuko duen izena zehazten da; izen bakarra jaso da, eta bi etxebizitza zozketatuko dira.
- Bigarren atal batean, hiru edo seme alaba gehiago dituzten familiak sartu dira: guztira, bost izen. Hortaz, hiru logeladun 28 etxeetatik bi familia ugariendako erreserbatu dira. Edozelan ere, zein etxe izango diren ez da zehaztu. Familia ugariendako etxeen zozketan zorterik ez dutenek hirugarren eta azken zozketan sartzeko eskubidea izango dute.
- Hirugarrenean, bi logelako 26 etxebizitza zozketatuko dira. Hala, zozketa honetarako, 550 izen jaso dira.
Santa Ana aretoan jarri diren zerrendetan, prozesutik kanpo geratu direnen izenak ere jaso dira. Orain hilabete ikusteko jarri zuten behin-behineko zerrendarekin alderatuta, egun ikusgai dagoen zerrendan, zazpi izen gutxiago agertzen dira.
Hamabost alegazio
Behin-behineko zerrenda ikusgai egon zen artean, ekainaren 14ra arte, hamabost alegazio jaso zituzten Udal bulegoetan. Ondoren, alegazioak aztertu ziren, eta guztiak baztertu egin zituzten. Bakar-bakarrik, zozketan parte hartzeari uko egiten ziotenen eskaerak onartu ziren.
Haren ondotik, Ugarkaldeko zozketarako zerrenda osatu da.